- 30 mín
- Fyrir ca 3 (einfalt að stækka)
Haustveður kallar hreinlega á góða súpu.
Sonur okkar er alveg pottþétt mesti blómkálssúpu aðdáandi á landinu og afar fátt sem honum finnst betra. Æðið hans fyrir blómkálssúpu byrjaði þegar hann smakkaði hana fyrst í leikskólanum og hef ég verið að keppast við það að búa til betri blómkálssúpu heldur en matráðurinn í leikskólanum í mörg ár. Loksins sagði barnið: “Mamma þetta er besta blómkálssúpa sem ég hef nokkur tíman smakkað!” og þið getið rétt svo ímyndað ykkur hvernig mamman bráðnaði eins og smjör á fljúgandi heitri pönnu!
Hráefni
- 1 stór blómkálshaus
- Vatn
- 4 dl rjómi (líka hægt að nota 50/50 mjólk og rjóma)
- 2-3 stk grænmetisteningur
- 1-2 tsk soja sósa
- ¼ tsk karrý
- ½ tsk salt
- ½ tsk pipar
- Ferskt kóríander (má sleppa en er alveg frábært með)
Aðferð
- Hreinsið blómkálið, skerið það gróft niður og setjið í pott. Látið vatn fljóta örlítið yfir blómkálið og sjóðið fyrst með lok á pottinum en þegar suðan er komin vel upp þá takiði lokið af og haldið áfram að sjóða þangað til um það bil 1/3 af vatninu er gufað upp.
- Takið ¼ af soðna blómkálinu upp úr pottinum og setjið í skál, maukið það sem er eftir í pottinum með töfrasprota eða blandara.
- Setjið 4 dl af rjóma í pottinn og hitið, bætið grænmetisteningunum, soja sósunni og kryddunum saman við í skömmtum. Það er betra að byrja á að setja minna, smakka og setja svo meira af kryddunum eftir smekk.
- Setjið heila soðna blómkálið aftur í pottinn og leyfið súpunni að malla í um það bil 5-10 mín. Berið svo súpuna fram með ferskum kóríander og heitu baguette.
Njótið vel