- 3 klst og 30 mín
- 16 snúðar
Mjúkir kanilsnúðar með glassúri sem eru alveg æðislega góðir! Hér er að finna eina vinsælustu uppskriftina á síðunni minni og er það ekki af ástæðulausu! Snúðarnir eru einstaklega góðir, alveg það góðir að það var erfitt fyrir mig að mynda þá og ekki borða þá fyrst.
Hráefni
Snúðar
- 7 g þurrger
- 120 ml volgt vatn
- 120 ml volg mjólk
- ½ dl sykur
- 80 g brætt smjör
- 1 tsk salt
- 1 egg
- 450 g hveiti
Fylling
- 120 g mjúkt smjör
- 2 dl sykur
- 2 msk kanill
Glassúr
- 4 msk smjör
- 400 g flórsykur
- ½ tsk vanilludropar
- 2-3 msk heitt vatn
- 2 msk rjómaostur (má sleppa, en er voðalega gott)
Aðferð
Snúðar
- Byrjað er á að setja volgt vatn og volga mjólk ásamt gerinu í litla skál og hrært smá til að þurrgerið blotni.
- Setjið sykur, smjör, salt og egg í stóra skál og hrærið saman.
- Bætið svo nánast öllu hveitinu út í, skiljið um það bil 50 g eftir, og hellið gerblöndunni líka ofan í stóru skálina. Hnoðið deigið saman þangað til allt hefur blandast vel. Deigið á að vera klístrað en ef það er ennþá mjög blautt setjið þá restina af hveitinu út í.
- Látið deigið hefast í 1 – 1 ½ klst eða þangað til deigið hefur tvöfaldast í stærð.
Fylling
- Þegar deigið hefur hefað sig dreifið þið svolítið af hveiti á borðið, takið deigið úr skálinni og fletjið það út í um það bil 20×40 cm flöt.
- Blandið saman mjúku smjöri, sykri og kanil í skál, hrærið þar til blandað saman. Smyrjið fyllingunni yfir allt deigið.
- Rúllið svo upp deiginu frá 40 cm endanum í lengju og skerið hana svo í 12 – 15 bita.
- Smyrjið frekar stórt eldfast mót með smjöri og raðið snúðunum ofan í formið, það má vera frekar rúmt á milli snúðanna því þeir eiga eftir að stækka.
- Leggið hreint viskustykki yfir formið og látið snúðana hefast í um það bil 30 mín.
- Stillið ofninn á 175°C og undir og yfir hita.
- Setjið snúðana í ofninn og látið bakast í 35-45 mín (tími fer eftir hversu þykkir snúðarnir eru) eða þangað til þeir eru orðnir fallega gullnir á litinn.
Glassúr
- Á meðan snúðarnir eru í ofninum er gott að útbúa glassúrið. Það er gert með því að bræða smjörið í potti og bæta svo flórsykrinum útí og hrært vel.
- Bætið svo vanilludropunum útí ásamt heitu vatni. Best er að setja vatnið hægt út í og hræra vel eftir hverja skeið. Setjið 2 skeiðar ef þið viljið sleppa rjómaostinum, annars 3 msk. Hrærið rjómaostinn saman við.
- Smyrjið svo glassúrinu yfir í því magni sem þið viljið.
Njótið,
Linda Ben