Þessi uppskrift er innblásin af ferð okkar hjóna með útgefendum okkar til Toscana sumarið 2013, áður en fyrsta bókin mín – Tími til að njóta – kom út. Við leigðum saman stóra íbúð í kastala uppi á lítilli hæð með dásamlegu útsýni yfir nærliggjandi sveitir – Castello di Starda.
Þegar við stigum út úr bílnum fundum við ilminn af kryddjurtum sem uxu meðfram veginum upp að kastalanum. Þar voru í okkar augum endalausar breiður af lárviðarlaufum, myntu, timíani og sérstaklega rósmaríni sem virtist vaxa eins og illgresi.
Í uppskriftinni er stungið upp á því að nota vin santo sem er sætt ítalskt eftirréttavín, ef það er ekki til má nota marsala í staðinn.
Hráefni
- 1 kg grísalundir
- börkur af heilli sítrónu
- 1 tsk fersk salvía
- 2 tsk ferskt rósmarín
- 4 tsk vin santo (eða marsala)
- 4 tsk mjög góð jómfrúarolía
- salt og pipar
Aðferð
- Kljúfið grísalundina eftir miðju (gætið að því að skera ekki alla leið í gegn) og flettið lundinni upp eins og bók.
- Skerið börkinn af sítrónu (bara gula hlutann – ekki þannhvíta þar sem hann er rammur og bragðvondur). Hakkið börkinn og blandið saman við kryddjurtirnar.
- Nuddið grísalundina upp úr jómfrúarolíu, víni og svokryddjurtum.
- Saltið og piprið.
- Bindið lundina upp með snæri.
- Grillið á meðalháum hita þar til kjarnhiti nær a.m.k. 60°C (margir miða við 72°C fyrir svínakjöt).
- Látið síðan hvíla ínokkrar mínútur áður en þær eru bornar fram.