Guðrún Sóley birtir þessa uppskrift af súkkulaðiköku með djúsí smjörkremi í Grænkerakrásum sem er full af gómsætum vegankrásum. Þessi ilmandi, ljúffeng og klassísk kaka er laus við alla stæla.
Hráefnis
- 6 dl hveiti
- 5 dl sykur
- 2 dl kakó
- 1 tsk lyftiduft
- 1/2 tsk matarsódi
- 4 dl jurtamjólk að eigin vali
- 1 dl grænmetisolía, til dæmis sólblóma- eða repjuolía
- 2 msk eplaedik
- 1 tsk vanilludropar
Krem
- 1 dl möndlumjólk
- 100 g möndluflögur
- 120 g smjörlíki eða vegan smjör í teningum
- 1 tsk salt
- 1/2 dl olía
- 1 msk epla- eða hvítvínsedik
- 50 g flórsykur
- 3 msk kakó
- 1 msk instant kaffiduft
Aðferð
- Hitið ofninn í 180°C.
- Hellið jurtamjólk, olíu, ediki og vanilludropum í hrærivélarskál og blandið vandlega á miðlungshraða í um 4-5 mín. Aukið svo hraðann þar til blandan er orðin létt í sér og loftkennd.
- Bætið þá þurrefnum saman við og blandið vel.
- Hellið blöndunni í kökuform (um 20 x 20 x 5 cm) og bakið í um 30 mínútur.
Á meðan er gott að útbúa krem.
- Látið öll innihaldsefnin í hrærivélarskál að smjörinu undanskildu.
- Hrærið fyrst á miðlungshraða, bætið smjörinu við, tening fyrir tening.
- Þegar allt smjörið er komið út í aukið þá hraðann þar til kremið hefur náð ákjósanlegri þykkt og áferð.
- Það er hyggilegt að setja kremið í kæli í stutta stund áður en það er sett á kökuna, þá þykknar það og þéttist.
- Smyrjið þykku lagi á kökuna, berið fram og njótið.
Eftir Guðrúnu Sóley