Ég er mikill taco maður, mér finnst steikar taco gott sem og kjúklinga, em þetta rækju taco stendur algjörlega upp úr hjá mér. Sósan með þessu er alveg einstaklega bragðgóð, það verða allir að prófa þessa uppskrift.
Hráefni
- 800 gr risarækur
- 12 taco skeljar
- 1 bolli ólífuolía
- 1 msk chili flögur
- 1 msk hvítlauksduft
- 1 msk gróft salt
- 1 msk pipar
- 1 msk töfrakrydd
- 3 stk hvítlauksgeirar
Kóríander- og lime sósa
- 1/2 bolli majónes
- 1/2 bolli hrein jógúrt
- 30 gr kóríander
- 1 stk jalapeno
- 1 stk lime
- 2 stk hvítlauksgeirar
- 1/2 hvítkálshaus eða rauðkálshaus (val).
Aðferð
- Settu rækjur í skál með vatni í um 15 mínútur til að þíða þær, settu rækjurnar næst í sigti og skolaðu þær.
- Settu rækjurnar í poka og helltu ólífuolíunni í pokann. Lokaðu pokanum vel og hristu þar til að rækjurnar eru vel þaktar olíu.
- Skerðu hvítlauksgeirana smátt og bættu ofan í pokann ásamt öllum hráefnunum í tacos að undanskildum taco skeljunum. Hristu þar til að öll hráefnin hafa blandast vel saman.
- Leyfðu rækjunum að marenerast í allavegana 30 mínútur, á meðan skaltu útbúa kóríander- lime sósuna.
- Hitaðu ofninn á 180 gráður og stilltu á blástur
- Raðaðu rækjunum á grillspjót, grillaðu þær á 200 gráðu heitu grili í 4-6 mínútur, snúðu þeim við á mínútu fresti ( einnig er hægt að steikja rækjurnar á pönnu með ólífuolíu í 4-6 mínútur).
- Settu taco skeljar á bökunarplötu og hitaðu í 5 mínútur
- Raðaðu loks blöndunni úr pokanum á taco skeljarnar og settu kóríander-lime sósu yfir.
Kóríander- og lime sósa
1. Blandið öllum hráefnunum saman í blandara fyrir utan hvítkálshausinn
2. Skerið hvítkálið niður í smáa bita og blandið saman við sósuna.
