Pizza snúðar slá alltaf í gegn í nesti, tilvalið á leikjarnámskeiðin yfir sumartímann.

Hérna kemur uppskrift af góðum pizza snúðum, tilvalið að fyrsta í pokum og eiga alltaf nesti klárt.

Innihald

• 1 bréf þurrger
• 5 dl mjólk (37°heit)
• 3 msk ólívuolía
• 1 tsk salt
• 1 msk sykur
• 1 egg
• ca 14 dl hveiti

Fylling

1. 200 gr skinka
2. ca 1 dl pizzasósa
3. 4 dl rifinn ostur
4. 2 msk oregano

Aðferð

1. Blandið saman þurrgerinu og smá af fingurheitri mjólkinni. Setjið afganginn af mjólkinni út í ásamt ólívuolíunni, saltinu, sykrinum og egginu.
2. Setjið nánast allt hveitið saman við og vinnið deigið vel saman. Ég hnoða það í ca 5 mínútur í hrærivélinni.
3. Látið deigið hefast á hlýjum stað í amk 30 mínútur, mér finnst oft flýta fyrir að setja rakan klút yfir skálina.
4. Skerið skinkuna niður í smáa bita, hér má einnig setja hvað sem hverjum og einum langar í svo sem pepperoni, ólífur, rjómaost og leyfa hugmyndarfluginu að ráða.
5. Þegar deigið er búið að hefast er það lagt á mjölað borð og hnoðað létt saman.
6. Skiptið deiginu í tvo hluta og fletjið hvorn hluta í aflanga köku. Smyrjið pizzasósu á deigið og stráið skinkubitum, osti og oregano yfir. Rúllið deiginu saman og skerið hverja rúllu í ca 10-12 bita.
7. Leggið bitana á bökunarpappir og leyfið þeim að hefast í amk 25-30 mínútur.
8. Hitið ofninn í 200°.
9. Penslið snúðana með hrærðu eggi og stráið smá oregano kryddi yfir.
10. Bakið snúðana í miðjum ofni í 10-15 mínútur.