Eins og mér þykir lasagna gott þá mikla ég það alveg stórkostlega fyrir mér að elda lasagna af því það þarf tíma í ofninum. Sumir sjóða lasagna blöðin áður en rétturinn er samsettur til að stytta tímann en mér finnst það yfirleitt enda með maukuðum lasagna plötum.
Góð lausn fyrir þau sem ekki vilja standa í því er að nota ferskt pasta, t.d. frá Pastella. Rétturinn bragðast þó alveg jafn vel þótt notað sé hefðbundið pasta.
Hráefni
- 1 pakki nautahakk
- 1 pakki ferskt Lasagna frá Pastella
- ½ rauðlaukur, smátt skorinn
- 3 meðal stórar gulrætur
- 2 hvítlauksgeirar
- 750 ml pastasósa
- 1 msk ítölsk kryddblanda
- ½ tsk salt
- 1 tsk pipar
- u.þ.b. 1 stór lúka spínat, sjá aðferð
- 300 g rjómaostur
- 1 egg
- 100 g rifinn ostur
Aðferð
- Byrjið á því að kveikja á ofninum og stilla á 200°C.
- Skerið laukinn, og gulræturnar smátt niður. Steikið grænmetið á pönnu þangað til laukurinn er orðinn vel mjúkur.
- Bætið þá hakkinu út á pönnuna og steikið það þangað til það er fulleldað.
- Skerið hvítlauksgeirana smátt niður og steikið þá létt með hakkinu. Bætið sósunni út á pönnuna. Kryddið sósuna svolítið eftir smekk.
- Setjið rjómaost í skál og hrærið hann þangað til hann verður mjúkur. Bætið þá 1 eggi saman við og hrærið saman.
- Takið ykkur frekar stórt eldfast mót, setjið þunnt lag af kjötsósu í botninn og leggið svo lasagna plötur yfir. Setjið 1/3 af hvítu ostasósunni yfir lasagna plöturnar. Takið 1 góða lúku af skoluðu+þerruðu spínati og dreifið yfir. Setjið svo kjötsósu+lasagna plötur+hvítasósu yfir og endurtakið það svo í þriðja skiptið.
- Dreifið rifnum osti yfir og bakið inn í ofni í 25 mín.
Verði ykkur að góðu,
Linda Ben
Hér er umfjöllun um réttinn á lindaben.is
