Þessi lax í hvítlauks rjómasósu með sólþurrkuðum tómötum er algjört lostæti. Það tekur enga stund að smella í þennan rétt enda er hann afar einfaldur.
Rétturinn er algjör sprengja fyrir bragðlaukana og allt grænmetið gerir hann einstaklega skemmtilegam fyrir augað. Það er mjög gott að bera þennan rétt með hýðishrísgrjónum.
Hráefni
- 800 g lax
- 2 msk ólífu olía
- ½ laukur
- 4-5 hvítlauksgeirar
- 1 appelsínugul papríka
- 150 g sólþurrkaðir tómatar
- 180 g kirsuberjatómatar
- 300 ml rjómi
- 100 g spínat
- Salt og pipar
Aðferð
- Byrjið á því að krydda laxinn með salt og pipar, setja olíu á pönnuna og steikið fiskinn með roðið niður þar til hann er u.þ.b. eldaður í gegn, það er gott að setja lok á pönnuna svo hann eldist örlítið hraðar.
- Takið laxinn af pönnunni en haldið olíunni og því á pönnunni áfram.
- Skerið laukinn smátt niður og steikið hann á pönnunni, bætið við olíu eftir þörfum. Skerið hvítlaukinn og paprikuna líka niður og steikið. Skerið sólþurrkuðu tómatana niður og bætið þeim á pönnuna ásamt heilum kirsuberja tómötum.
- Bætið rjóma á pönnuna ásamt spínatinu og blandið öllu saman. Kryddið með salt og pipar og leyfið að malla í smá stund.
- Setjið laxinn aftur á pönnuna og hitið hann upp. Berið fram með hýðis hrísgrjónum.
Það besta er hvað manni líður alltaf vel eftir holla máltíð og þar leikur laxinn lykilhlutverk.
Verði ykkur að góðu,
Linda Ben
Hér er umfjöllun um réttinn á lindaben.is
