Mjúk karamellufyllingin og saxaðar hneturnar fullkomna hefðbundna brownies uppskrift eftir Ingu Elsu Bergþórsdóttur frá 2012. Bakaðu þessar – þú munt ekki sjá eftir því.
40-45 stykki
Hráefni
BROWNIES
- 150 g valhnetur
- 225 g smjör + smjör til að smyrja bökunarmótið
- 350 g Síríus 56% súkkulaði, grófsaxað
- 200 g sykur
- 4 stór egg
- 1 msk. vanilludropar
- 170 g hveiti
- ½ tsk. salt
KARAMELLUFYLLING
- 300 g Síríus karamellukurl
- 75 ml rjómi
- 150 g Síríus suðusúkkulaðidropar
Aðferð
BROWNIES
- Hitið ofninn í 180°C. Ristið valhneturnar á bökunarplötu í 6-7 mínútur.
- Takið hneturnar úr ofninum, grófsaxið þær og geymið.
- Klæðið bökunarmót, 23 x 33 sm að stærð, að innan með þykkum álpappír.
- Gætið þess að láta pappírinn ná upp á brúnirnar.
- Smyrjið álpappírinn ríflega með smjöri.
- Bræðið smjör í potti.
- Takið pottinn af hitanum, setjið súkkulaðið út í og hrærið þar til það hefur bráðnað og samlagast smjörinu.
- Þeytið vel saman í hrærivél sykur, egg og vanilludropa þar til blandan verður létt og ljós. Hellið síðan súkkulaðismjörinu út í og hrærið varlega saman.
- Bætið að lokum hveiti og salti við og hrærið vel saman.
- Hellið um helmingnum af deiginu í mótið og jafnið vel úr því (hinn helmingurinn bakast síðar).
- Bakið kökuna í 12 mínútur, takið úr ofninum og látið hana kólna í aðrar 20 mínútur.
KARAMELLUFYLLING
- Setjið karamellukurlið ásamt rjóma í pott og hitið varlega þar til kurlið bráðnar.
- Takið pottinn af hitanum og hellið karamellurjómanum strax yfir kökuna.
- Jafnið karamelluna með sleikju.
- Sáldrið helmingnum af hnetunum og suðusúkkulaðidropunum yfir og setjið afganginn af kökudeiginu yfir.
- Dreifið loks afganginum af suðusúkkulaðidropunum og hnetunum jafnt yfir deigið.
- Bakið í miðjum ofninum í 25 mínútur.
- Kælið kökuna alveg í mótinu, skerið í litla bita og berið fram með vanilluís eða rjóma.