Hér er á ferðinni uppskrift að sannkallaðri matarveislu. Lamb, bernaise og kartöflur - er hægt að biðja um meira?

Hráefni

Lambafillet

• 1200 g lamafillet (1 stk á mann)
• gott sjávarsalt
• nýmalaður pipar
• 2 stk. ferskar timjan greinar (2-3 stk)
• 1 dl ólífuolía
• 50 g smjör

Bernaise sósa

• 5 stk. eggjarauður
• 500 g smjör
• 1 stk. nautateningur eða annar kjötkraftur
• 2 msk. bernaise essence
• 2 msk. þurrkað estragon eða 1 msk. ferskt
• salt og pipar
• 1⁄2 stk. safi úr hálfri sítrónu

Hasselback kartöflur

• 800 g smáar kartöflur
• 2 stk. rauðlaukur
• 1 stk. Óðals Tindur eða sterkur Gouda
• 100 g smjör, brætt
• salt og pipar
• steinselja til skrauts

---

Aðferð

1. Ef ætlunin er að hafa lambakjöt í kvöldmat er gott að taka það úr ísskápnum að morgni. Snyrta bitana, skera af auka fitu og sinar ef einhverjar eru og skera í fituna tíglamynstur niður að kjötinu. Gætið þess að skera ekki í kjötið sjálft.
2. Kjötið er svo kryddað vel með salti og pipar. Sett í fat og ólífuolíu hellt yfir kjötið og því velt vel upp úr olíunni. Svo er fatið sett inn í ísskáp, engin filma yfir og fituhliðin látin snúa upp.
3. 1 klst áður en kjötið er eldað er gott að taka það úr ísskápnum og leyfa því að ná stofuhita.
4. Hitið ofn í 180 gráður.
5. Bræðið 50 g af smjöri á pönnu við meðalháan hita, setjið timjan greinarnar í smjörið og leyfið þeim að krauma með. Steikið kjötið svo á fituhliðinni í smjörinu í góðar 4 mín. eða þar til puran er gullin og stökk. Snúið þá kjötinu við og stingið inn í ofn í 10-12 mín. Þá ætti steikin að vera fallega bleik í miðjunni. Ef þið viljið gegnsteikja kjötið er vissara að hafa það í 15-17 mín. í ofninum.
6. Þegar kjötið er tekið út er smjörinu og fitunni, sem er á pönnunni, ausið yfir kjötið. Leyfið því svo að standa í 10 mín. áður en það er skorið.
7. Berið fram með bernaise-sósu og bragðmiklum hasselback-kartöflum með osti og bökuðum rauðlauk.

Bernaise sósa

1. Bræðið smjörið með kjötkraftinum.
2. Takið af hitanum og leyfið aðeins að rjúka.
3. Setjið eggjarauðurnar í hitaþolna skál, stál eða gler.
4. Setjið vatn í pott, hleypið upp suðunni og lækkið svo alveg undir.
5. Leggið skálina ofan á pottinn, gætið þess að botninn snerti ekki vatnið og þeytið eggjarauðurnar þar til ljósar og léttar. Ég nota lítinn rafmagnshandþeytara.
6. Takið pottinn með skálinni af hitanum. Hellið smjörinu mjög rólega saman við eggin í mjórri bunu og þeytið stanslaust á meðan, þetta tekur um 5-7 mínútur.
7. Kryddið svo með estragoni og bernaise essence.
8. Smakkið til með sítrónu, salti og pipar.
    
   Sósan geymist vel undir plastfilmu við stofuhita í 2-3 klst, borin fram stofuheit eða hituð rólega upp yfir vatnsbaði.

Hasselback kartöflur

1. Skerið þunnar rifur í kartöflunar og gætið þess að skera ekki alla leið í gegn.
2. Skerið ostinn í litla bita og stingið 3-4 bitum í hverja kartöflu.
3. Leggið kartöflurnar í eldfast mót og setjið laukinn í bátum inn á milli.
4. Hellið bræddu smjöri yfir allt saman og kryddið með salti og pipar.
5. Bakið við 180 gráður í 40 mínútur eða þar til kartöflurnar eru eldaðar í gegn.
6. Stráið steinselju yfir og berið fram.

 

Eftir Helenu Gunnarsdóttur