Úr hráefni sem fer einstaklega vel saman. Bæði má djúpsteikja kjúklinginn eða grilla í ofni. 

Hráefni 

Grillaður maís

• 1 mskrepjuolía
• 2 stk maísstönglar, mega vera fleiri

Salat

• 1 stk romain salathaus
• 1 stk avocado
• Goðdala ostur að eigin vali 

Ostasósa

• 5 msk sýrður rjómi 18% frá Gott í matinn
• 2 msk majónes
• 1 msk ólífuolía
• 2 msk rjómi frá Gott í matinn
• 2 msk dijon sinnep
• 2 msk rjómaostur með graslauk og lauk
• 2 msk gráðaostur
• 2 msk rifinn cheddarostur
• 1 msk provence-krydd frá Pottagöldrum, eða annað blandað jurtakrydd

Kjúklingur

• 4 stk kjúklingabringur, skornar í jafna strimla (ath. bakkar í innkaupalista innihalda 3 bringur)
• 1 stk egg, hrært
• Salt, pipar og paprikukrydd
• 150 g panko rasp eða annað brauðrasp

---

Aðferð

Grillaður maís

1. Olían er sett á pönnu og hituð.
2. Hér má skera fersk maískornin strax af stönglunum áður en þau fara á pönnuna eða steikja fyrst og skafa svo.
3. Maískornin eru látin brúnast aðeins á pönnunni og fá á sig grilltóna.
4. Tabasco dreypt yfir ef vilji er til að fá smá bit í kornin.

Salat

1. Rífið salatið gróft niður og setjið í stóra skál.
2. Skerið avokadó niður í sneiðar en ekki setja saman við salatið. Það fer yfir í lokin.

Ostasósa

1. Allt hráefnið er sett í matvinnsluvél og hrært vel saman þar til sósan er lungamjúk. Það er líka hægt að hræra og blanda með töfrasprota og svo bara í höndunum!
2. Má þynna með meiri rjóma ef þarf.
3. Hrærið sósuna saman við salatblöðin í skálinni. Það þarf líklega ekki alla sósuna saman við, gott að geyma og dreypa yfir salatið þegar allt er komið saman.

Kjúklingur

1. Setjið kjúklinginn, kryddin og eggið í matvinnslupoka og hristið saman.
2. Bætið raspinu saman við og nuddið allt vel saman svo raspið festist á kjúklingnum.
3. Hér má bæði djúpsteikja kjúklinginn í repju- eða sólblómaolíu þar til hann er gullinn og eldaður í gegn. Eða setja hann í 200 gráðu heitan ofn í 12-15 mínútur.

Samsetning

1. Salatinu er raðað saman. Hægt að raða á eitt stórt fat eða gera diska fyrir hvern og einn.
2. Salat á disk, avokadó ef vill. Maískorn yfir. Kjúklingur. Ostaflögur. Meiri sósu dreypt yfir. Borið fram.