Lambakjöt, rjómalöguð sósa og bakaðar kartöflur. Hér er svo sannarlega á ferðinni fullkominn helgar- eða hátíðarmatur.

Rétturinn hentar fyrir sex

---

Hráefni - fyrir sex

• 1 kg lambafille
• 50 g smjör
• 2 greinar ferskt timjan, 2-3 greinar
• salt og pipar

Rjómalöguð sveppasósa

• 250 g sveppir
• 1 stk. hvítur laukur
• 2 stk. hvítlauksrif
• 50 g smjör
• 150 ml hvítvín (má sleppa)
• 250 ml rjómi
• 2 stk. lárviðarlauf
• 4 greinar ferskt timjan, 4-5 greinar
• smjörbolla (hveiti og smjög) til þykkingar (eða sósujafnari)
• salt og pipar

Kartöflur - Pommes Anna

• 1 kg kartöflur
• 100 g smjör
• salt og pipar

Allt hráefni er á innkaupalistanum nema salt og pipar. 

---

Aðferð

1. Látið kjötið standa við stofuhita í klukkustund áður en það er steikt til að tryggja að það verði mjúkt eftir steikingu.
2. Skerið létt í fituna til að opna hana upp, saltið og piprið ríkulega.
3. Bræðið smjör á pönnu og þegar það er bráðið bætið timjan greinunum út í.
4. Setjið því næst lambið varlega á pönnuna með fituna niður. Steikið þangað til að hún hefur tekið á sig fallegan gullinbrúnan lit og steikið svo á hinni hliðinni.
5. Það er gott að ausa bráðnu smjörinu upp á puruna til að bæta bragð hennar ennþá frekar.
6. Þegar lambið er fallega brúnt að utan er það sett í 180 gráðu heitan ofn og bakað þangað til að kjarnhiti nær 50-54 gráðum (eftir smekk). Hvílið í nokkrar mínútur áður en það er skorið.

Rjómalöguð sveppasósa

1. Skerið sveppina í sneiðar eða bita. Flysjið og skerið laukinn og hvítlaukinn smátt.
2. Bræðið smjör í potti og steikið fyrst laukinn í nokkrar mínútur við miðlungshita. Bætið svo sveppunum og lárviðarlaufunum saman við og steikið um stund þar til sveppirnir fara að taka lit.
3. Saltið og piprið.
4. Bætið því næst hvítlauknum saman við og steikið áfram við lágan hita þar til að allur vökvi af sveppunum er gufaður upp og sveppirnir fara að karmelliserast.
5. Hellið hvítvíninu á pönnuna og sjóðið upp áfengið. Bætið því næst lambasoðinu og timjaninu saman við og sjóðið niður um þriðjung. Saltið og piprið eftir smekk.
6. Bætið rjómanum saman við og hitið að suðu. Fjarlægið lárviðarlaufin og timjan greinarnar með gaffli.
7. Þykkið sósuna með smjörbollu eða sósujafnara. Smakkið sósuna til.

Kartöflur - Pommes Anna

1. Sneiðið kartöflurnar næfurþunnt með mandólíni.
2. Penslið eldfast mót með smjöri. Raðið kartöflunum þétt niður og penslið með smjöri á milli laga auk þess að salta og pipra reglulega.
3. Þrýstið kartöflunum niður í mótið. Penslið efsta lagið með smjöri.
4. Bakið á grillinu við óbeinan hita í 45-55 mínútur.

Verði ykkur að góðu!

Höfundur: Ragnar Freyr Ingvarsson

Uppskriftin er frá Gott í matinn