Það er eitthvað svo lokkandi við pottrétti og þessi hér frá Gott í matinn svíkur ekki unnendur gúllas eða annarra pottrétta.

Hráefni - fyrir fjóra til fimm

• 600 g nautagúllas
• 150 g tómatpúrra
• 1 stk. laukur
• 1 stk. rauð paprika
• 5 gulrætur
• 200 g rjómaostur frá Gott í matinn
• 200 g matreiðslurjómi frá Gott í matinn
• Hrísgrjón
• Salt, pipar, karrý, paprikukrydd og kraftur

Allt hráefni er á innkaupalistanum nema salt og pipar.

Aðferð

1. Saxið niður lauk, skerið gulrætur í sneiðar og papriku í strimla.
2. Steikið laukinn á meðalhita upp úr olíu og karrý þar til hann mýkist. Bætið gulrótum og papriku saman við, ögn meiri olíu og salti og pipar og færið yfir á disk.
3. Léttsteikið gúllasið í olíu á sömu pönnu, nóg er að rétt brúna það á hliðunum því það mun fulleldast þegar pottrétturinn mallar.
4. Bætið tómatpúrru á kjötið á pönnunni, rjómaosti og matreiðslurjóma og hrærið vel.
5. Hellið grænmetinu saman við og kryddið réttinn til með salti, pipar, paprikudufti og krafti.
6. Gott er að leyfa réttinum að malla í 30-60 mínútur.
7. Sjóðið hrísgrjónin meðan rétturinn mallar samkvæmt leiðbeiningum á pakka.

Verði ykkur að góðu. 

Höfundur: Berglind Hreiðarsdóttir