Fljótlegur kjúklingaréttur með basmati hrísgrjónum - og ekki bara fljótlegur heldur líka ljúffengur eins og allt sem kemur frá lækninum í eldhúsinu.

Hráefni - fyrir fimm

• 700 g úrbeinuð kjúklingalæri
• 360 g sýrður rjómi 36% frá Gott í matinn (2 dósir)
• 250 ml kjúklingasoð
• 250 g sveppir
• 2 gulir laukar
• 2 hvítlauksrif
• 100 g smjör
• 2 msk jómfrúar ólífuolía
• 1 msk sterkt paprikuduft
• 1 msk sætt paprikuduft
• 1 msk dijon hunangssinep
• 1 msk ferskur graslaukur, smátt skorinn
•  worchestershire sósa
• 1 bolli basmati hrísgrjón
• 2 bollar salt vatn
• salt og pipar 

Allt er á innkaupalistanum nema salt og pipar. Athugið að margt gæti verið til heima, s.s. smjör og olía en þá er ekkert mál að kippa því af innkaupalistanum. 

Aðferð

1. Byrjið á því að sneiða sveppina, laukinn í þunnar sneiðar og hvítlaukinn smátt niður.
2. Bræðið helminginn af smjörinu á pönnu og steikið laukinn í nokkrar mínútur þangað til að hann er mjúkur. Bætið þá papríkuduftinu saman við og ristið á pönnunni í mínútu eða svo.
3. Bætið næst sveppunum og hvítlauknum saman við og steikið í nokkrar mínútur þar til sveppirnir eru orðnir mjúkir. Gætið þess að brenna ekki hvítlaukinn.
4. Bætið næst sinnepinu saman við og blandið vel saman. Setjið sveppina og laukinn til hliðar.
5. Skerið kjúklinginn í strimla.
6. Bætið restinni af smjörinu og olíunni á pönnuna og steikið kjúklinginn vandlega.
7. Saltið og piprið.
8. Bætið því næst sveppunum og lauknum saman við og blandið vel saman.
9. Bætið heitu kjúklingasoði saman við og sjóðið niður í fimm mínútur.
10. Bætið að lokum sýrða rjómanum saman við og hrærið varlega.
11. Sjóðið rjómann upp og svo niður um þriðjung.
12. Smakkið sósuna og bragðbætið með salti, pipar og Worchestershire sósu eins og bragðlaukarnir kveða á um.
13. Á meðan verið er að vinna í kjúklingaréttinum - sjóðið hrísgrjónin samkvæmt leiðbeiningum

Og þá er bara að njóta!

Eftir Ragnar Frey Ingvarsson