Eitt Sett Sörur

*Fjöldi 60 kökur *

*Hráefni *

Krem

• 3 eggjarauður

• 100 ml vatn

• 100 g sykur

• 300 g Eitt Sett rjómasúkkulaði

• 100 g smjör við stofuhita

*Botnar *

• 3 eggjahvítur

• 1/3 tsk. salt

• 50 g sykur

• 200 g flórsykur

• 200 g möndlumjöl

*Hjúpur *

• 400 g 56% Síríus Barón súkkulaði
  

Aðferð

1. Takið smjörið útúr ísskáp svo það nái að mýkjast fyrir skref 4.
   
2. Byrjið á því að útbúa kremið.
   
3. Þeytið eggjarauður í hrærivél þar til blandan er orðin létt og ljós. Hitið vatn og sykur í potti í um 3 mínútur eða þar til sykurinn hefur náð að leysast upp í vatninu. Hellið sykurvatninu saman við eggjarauðurnar í mjórri bunu og hrærið rólega á meðan. Þeytið þar til blandan er loftmikil og nánast hvít að lit.
   
4. Bræðið Eitt Sett súkkulaðið. Hellið því næst súkkulaðibráðinni saman við eggjablönduna í mjórri bunu og hrærið rólega á meðan. Stoppið reglulega og skafið hliðar skálarinnar með sleikju svo allt blandist vel saman. Skerið mjúka smjörið í litla bita og þeytið það saman við.
   
5. Geymið kremið inni í ísskáp í um klukkutíma eða á meðan verið er að útbúa botnana.
   
6. Kveikið á ofninum og stillið á 175°C, yfir- og undirhita.
   
7. Setjið eggjahvítur í skál ásamt salti, þeytið þar til blandan freyðir og bætið þá sykrinum út í.
   
8. Þeytið þar til stífir toppar myndast.
   
9. Blandið saman flórsykri og möndlumjöli. Bætið út í eggjahvítublönduna og blandið varlega saman við með sleikju.
   
10. Hellið deiginu ofan í sprautupoka með hringlaga stút.
    
11. Sprautið á smjörpappírsklæddar ofnplötur þannig að hver kaka sé u.þ.b. 4 cm í þvermál, passið að hafa allavega 2-3 cm bil á milli þeirra svo að þær klessist ekki saman í bakstri.
    
12. Bakið í u.þ.b. 12 mín. Leyfið kökunum að kólna.
    
13. Smyrjið kremi á hverja köku svo það sé kúpt í miðjunni en þynnist út að köntunum. Kælið kökurnar í stutta stund.
    
14. Bræðið loks Barón súkkulaði yfir vatnsbaði og hjúpið hverja köku með því að dýfa kreminu ofan í súkkulaðið. Hér er tilvalið að dunda sér við að tempra súkkulaðið en ekki nauðsynlegt. Frekari leiðbeiningar um temprun má finna á fyrstu opnu bæklingsins.
    
15. Leggið kökurnar á grind á meðan súkkulaðið storknar.