Stórfyndið og einfalt spil fyrir 3–10. Hver spilari fær 10 komment á hendi. Í hverri umferð er einn ritstjóri sem leggur út fyrirsögn. Hinir spilararnir leggja síðan komment í púkkið. Ritstjórinn velur kommentið sem honum þótti skemmtilegast í samhenginu og spilarinn sem lagði það út fær stig. Í spilinu eru tvenns konar spjöld: 320 kommentaspjöld og 80 fyrirsagnas­pjöld. Langflest kommentin eru byggð á raunverulegum athugasemdum frá íslenskum netverjum. Þannig fær maður þá raunveruleika­tilfinningu sem fylgir óstjórnlegri reiði, stafsetningarvillum og handahófskenndri notkun á greinarmerkjum. Þó er rétt að nefna að jafnvel eðlilegustu athugasemdir geta orðið stórfyndnar þegar þær eru settar í rangt samhengi. Spilið hentar 13 ára og eldri, það inniheldur nokkuð af dónalegum orðum sem flest grunnskólabörn þekkja. Það tekur varla nema svona tvær mínútur að læra spilið og síðan getur skemmtunin hafist!

#Kommentakerfið II er sjálfstætt framhald sem hægt er að spila eitt og sér