D-vítamín er stundum kallað sólarvítamín vegna þess að húðin framleiðir það þegar hún verður fyrir áhrifum útfjólublárra geisla sólarljóss, auk þess fáum við D-vítamín úr fæðunni aðallega fiskmeti, en því miður þá er fiskur á undanhaldi sem vinsæll matur hér á Íslandi. D-vítamín er fituleysanlegt þ.e. líkaminn geymir umframmagn af D-vítamíni í lifrinni til betri tíma. Rannsóknir hafa sýnt fram á að fólk á norðlægum slóðum þarfnast aukins D-vítamíns á veturna vegna þess hve stutt dagsbirtu nýtur þá við. D vítamín er nauðsynlegt fyrir eðlilegan beinvöxt og til að styrkja beinin, það stuðlar að betri upptöku á kalki, fosfór og fleiri steinefnum.