Ótrúlegur árangur íslenskra kvenna á heimsleikunum í CrossFit hefur vakið mikla athygli og gert að verkum að „DÓTTIR“ má heita gæðastimpill á afrekskonur þar. Hér segir Katrín Tanja Davíðsdóttir, tvöfaldur heimsmeistari í CrossFit, baráttusögu sína og rekur leiðina sem hún fór á hæstu tinda.

Þegar hún kynntist CrossFit breyttist líf hennar, hún hafði fundið líkamlega og andlega áskorun sem heillaði hana og krafðist þess að hún gæfi í hana

allt sem hún ætti – og meira til. Hún tókst á við sigra og ósigra og náði á toppinn, keppti við einstakt afreksfólk og varð heimsmeistari í Los Angeles. Svo kom bakslagið og allt gekk á afturfótunum. En hún nýtti sér andstreymið til að leggja enn meira á sig með aðstoð frábærs þjálfara og teymis og einbeitti sér að því að þroska hugarfarið jafnframt því að þjálfa líkamann að þolmörkum, með þeim árangri að hún hlaut aftur titilinn hraustasta kona heims.

DÓTTIR er bók sem veitir CrossFit-iðkendum og öðru íþróttafólki jafnt sem aðdáendum Katrínar innsýn í líf einnar fremstu íþróttakonu heims og það sem hún hefur gert til að ná árangri og verða fyrirmynd.

„Saga hennar minnir aðdáendur og verðandi íþróttafólk á að allir geta náð frábærum árangri ef þeir eru tilbúnir að vinna nógu vel og jafnframt er hún vitnisburður um dug íslensku dætranna, sem gerir mig mjög stolta.“

ANNIE MIST ÞÓRISDÓTTIR, TVÖFALDUR HEIMSMEISTARI Í CROSSFIT