Þennan rétt geri ég ótrúlega oft. Hann er einstaklega bragðgóður og að mínu mati þessi “ultimate comfort food”, hver biti er eins og knús fyrir sálina og ekki verra ef hann er borinn fram með ljúfu rauðvínsglasi.
Þessi réttur á við hvort sem er hversdags eða við fínni tilefni.
Hráefni
- 350 g Tortellini fyllt með osti
- 3 kjúklingabringur
- Ólífu olía
- Salt og pipar
- ½ laukur
- 250 g sveppir
- 50 g smjör
- 3 hvítlauksgeirar
- ½ l rjómi
- Kryddostur með hvítlauk
- Ferskt basil (ekki nauðsynlegt)
- Parmesan ostur
Aðferð
- Sjóðið tortellini samkvæmt leiðbeiningum á umbúðum.
- Skerið kjúklingabringurnar smátt niður og steikið upp úr ólífu olíu og salt og pipar þar til eldað í gegn. Takið kjúklinginn af pönnunni en ekki þrífa pönnuna.
- Skerið laukinn smátt niður og bætið út á pönnuna og steikið. Skerið sveppina frekar gróft niður og bætið á pönnuna ásamt smjöri. Steikið þar til mjúkir í gegn. Skerið hvítlaukinn smátt niður eða pressið með hvítlaukspressu út á pönnuna, steikið létt og bætið svo rjómanum strax út á. Leyfið að malla í smá stund við vægan hita.
- Rífið kryddostinn niður og bætið út á pönnuna og látið hann bráðna saman við. Bætið kjúklingnum aftur út á pönnuna.
- Smakkið til með salti og pipar.
- Setjið pastað í fallegt ílát, hellið sósunni yfir og berið fram með fersku basil og parmesan.
Mmm, verði ykkur að góðu,
Linda Ben
Hér er umfjöllun um réttinn á lindaben.is