Djúsí ofur einföldar og góðar kjötbollur eru í miklu uppáhaldi hjá mínum 6 ára! Hann borðar sjaldan betur en þegar þessar kjötbollur eru í matinn.
Hann (og við foreldrarnir) elskar hversu mjúkar og djúsí bollurnar eru, svo finnst honum líka svo gaman að hjálpa mér að búa þær til sem er mjög skemmtilegt fyrir okkur bæði 🥰
Hráefni
- 500 g nautahakk
- 1 egg
- 1 kryddostur með pipar frá Örnu Mjólkurvörum (má vera annar ostur)
- ¼ rauðlaukur
- 1 hvítlauksgeiri
- ½ pakki papriku Tuc kex
- 2 tsk ítölsk kryddblanda (t.d. pizzakrydd eða ítölsk blanda)
- Salt og pipar
- 250 ml Rjómi frá Örnu Mjólkurvörur
- 1 tsk nautakraftur
Aðferð
- Setjið nautahakkið í skál ásamt eggi, rifnum pipiar kryddosti, smátt söxuðum rauðlauk og hvítlauk, Tuc kexi, kryddblöndu og salt og pipar. Hnoðið öllu vel saman og myndið bollur, u.þ.b. 25 stk.
- Setjið um það bil msk af olíu á pönnu og steikið bollurnar á meðal hita á öllum hliðum. Hellið rjómanum á pönnuna, setjið kraftinn út í rjómann og hrærið hann saman við. Setjið lokið á pönnuna og leyfið að malla saman við vægan hita í um það bil 5-10 mín eða þar til sósan byrjar að þykkna og bollurnar eru eldaðar í gegn.
- Berið fram til dæmis með sætum kartöflum með feta osti.
Vonandi verðið þið jafn ánægð með réttin og við.
Kveðja,
Linda Ben
Hér er umfjöllun um réttinn á lindaben.is