Fiskur er eitt það hollasta sem við látum ofan í okkur. Og þessi slær í gegn hjá öllum aldurshópum.
Í uppskriftinni sem er frá Gott í matinn eru þorskhnakkar, 800 g fyrir fjóra, en auðvitað má leika sér með hráefni. Það er aðeins misjafnt hvaða fiskur á innkaupalistanum.
Athugaðu að í innkaupalistanum eru tvær pakkningar af fiski, það gæti verið býsna rýflegt - en alla vega ekki of lítið.
Hráefni
- 800 g fiskur (Berglind er með þorskhnakka í uppskriftinni, þú getur valið um fisk á innkaupalistanum)
- 30 g smjör
- 1⁄2 stk laukur
- 1 msk karrí
- 1 msk fiski- eða humarkraftur
- 500 ml rjómi frá Gott í matinn
- 100 g súrmjólk
- maizena mjöl
- salt, pipar, cheyenne pipar eftir smekk
- rifinn gratínostur frá Gott í matinn
Aðferð
- Hitið ofninn í 180°C.
- Skolið og þerrið fiskinn, skerið hann í 2-3 cm bita og raðið í botninn á eldföstu móti, kryddið með salti og pipar.
- Saxið laukinn mjög smátt (þannig finna börn ekki fyrir því það sé laukur en hann gefur svo gott bragð í réttinn).
- Steikið laukinn upp úr smjörinu við meðalhita þar til hann mýkist og kryddið með karrý, salt og pipar.
- Bætið þá rjóma, krafti og súrmjólk á pönnuna, náið upp suðunni og þykkið með maizenamjöli.
- Kryddið til með cheyenne pipar, salti, pipar og krafti eftir smekk.
- Hellið sósunni yfir fiskinn í fatinu.
- Setjið vel af rifnum gratínosti yfir og bakið í um 30 mínútur.
Eftir Berglindi Hreiðarsdóttur